Os amigos de París e Francia, reunidos na sociedade decana entre as xacobeas, xa entraron na plena madurez con 52 anos de existencia, e conseguiron os loureiros  do Premio Elías Valiña ó cumpri-los cincuenta. E que dicir da asociación de Estella, que xa consume os últimos meses da súa xuventude 31 anos). A Galega tamén é máis nova cá meirande parte das asociacións españolas do Camiño Francés, moitas delas creadas na década dos 80. Emporiso, cabe lembrarnos que a nosa andaina escomezou algún tempo antes, pois varios dos actuais socios e directivos xa tiñamos participado na fundación e actividades da Asociación de Amigos do Camiño de Santiago da Provincia da Coruña. Aquela encetara a súa curta traxectoria por mor dos desvelos de D. Elías Valiña, que deste xeito conseguía completa-lo mapa asociativo, un anceio persoal, do Camiño Francés. Recordamos hoxe con cariño a D. Angel Rodríguez González, presidente daquela asociación, coma unha das figuras máis salientables do rexurdir xacobeo tanto polas súas aportacións científicas (como titular de Historia Medieval da Universidade de Santiago e colaborador asiduo nas célebres semanas de Estella) coma polo seu trato sempre agradable e mailo seu talante servicial. Retomando o fío da crónica, cabe referir que trala desaparición da asociación coruñesa nos sentemos dignos herdeiros do seu traballo, remontándonos así ás orixes, digamos ‘apostólicas’, do movemento asociativo xacobeo.