Quen no-lo ía contar cando eramos cativos. Resulta que o tempo de xubileo converteuse en tempo de mudanza en forma de graves intervencións. Cada vez que a festa do apóstolo cae en domingo é cousa de poñerse a tremer. E non polas avalanchas de peregrinos de toda pelaxe e condición, e tampouco polo descarado uso político que se fai de tódolos actos vinculados co bonancible patrón pescador de homes, senón máis ben polos grandes investimentos previstos polas administracións.

Hai pouco, nun xornal galego tívemo-la ocasión de ler unha curiosa anécdota. Resulta que certo viaxeiro despistado, ó estilo de don Xurxiño o inglés - aquel inesgotable propagador da Biblia aló polos albores do século XIX- pero con bastante menos fondo, acudiu a un posto de turismo da comunidade autónoma galega para facer a seguinte e difícil pregunta: -¿Poderíame dicir, se é tan amable, a que hora está aberto o Camiño de Santiago?